Sopela. Literatura.
Sopela. Bakarmortuko kronikak liburuaren aurkezpena.Plaza Beltza kulturgunean. Maiatzaren 18an, barikua, 19:00etan.
Orain zazpi urte idatzi zituen Mikel Antza presoak kronikok, kartzelan. Badauzka gogoetak, poema laburrak eta bertsoak, eta Ataramiñe argitaletxeak kaleratu ditu. Antzak berak deskribatzen du lanaren zergatia hitzaurrean: “Sartu berritan ia egunero dago zerekin harritu. Urteak pasatu ahala, asaldatzeko ahalmena ez galtzean dago bizirauteko gakoa. Kartzelak min ematen du, beldurra sentiarazten digu eta gugan inoiz sumatu ez genuen gorrotoa ernarazten du. Horiek izan ziren nigan ordura arteko indar ezezagunez nagusitu ziren sentimenduak. (…) Aurre egiteko modua aurkitu behar izan nuen. Nire burua antolatu nuen eta borroka egiteko prestatu. Kartzelak irentsia ez izateko, norberak hobeki egokitzen zaion jarrera hartzen du. Isolamenduaren aurrean, idaztea izan zen nik hautatu nuen defentsa tresna”. Mikel Antza preso dago oraindino, eta, beraz, liburua aurkeztuko dute Mitxel Sarasketak, Oier Gonzalezek eta Zorion Zamakolak.
Asteburu bete bertso daukagu honakoa. Batetik, eta Bizkaiko Bertsolari Txapelketara begira, eskualde mailako kanporaketak egiten ari dira; Uribe Kostako bigarrena izango da barikuan, maiatzaren 18an. Barrikako Nagusien Etxean egingo dute 20:30etik aurrera eta bertso-afari formatua izango du. Imanol Uria, Aitzol de Kastro, Iñigo Kortazar, Pello Etxebarria, Gabi Basañez eta Ekaitz Larrazabal Katxo arituko dira nor baino nor. Kanporaketa horietako bertsolaririk onenek jokatuko dute finala ekainaren 2an, 17:30ean, Algortako Villamonte Kultur Etxean. Bestalde, Berangon ere egingo dute bertso-afaria asteburu honetan. Aurten 30 urte beteko ditu Sei Herri kultur elkarteak antolatu ohi duen ibilaldi neurtuak, eta ospatzeko egingo dute afaria; zapatuan izango da, 21:00etan eta pilotalekuan. Fredi Payak eta Arkaitz Estiballesek kantatuko dute. Ondo pasa!
Ohi legez, asteotan ere hainbat tailer eta jarduera prestatu du Sendik. Batetik, zirku-festa antolatu dute maiatzaren 18rako, barikurako: makillaje-tailerra, txokolate-jana eta antzezlana egingo dituzte, 17:30etik aurrera, Areetako Kukupraka udal ludotekan (eskoletako plazan). Bestetik, ekainaren 1ean egingo dute sukaldaritza-tailerra, 17:00etatik aurrera eta Itxas-Argia taldeko lagunen txokoan (Malakate plazan). Azkenik, ekainaren bigarren astebururako urteera prestatzen dabiltza Narbartera (Nafarroa), eta izena ematea dago ekainaren 1era arte. Informazio gehiago: www.egizu.org eta 685 732 963.